Igandean, urriaren 6an, Gipuzkoako ikastolen festa, Kilometroak, ospatuko da Tolosan. Azpeititik Tolosara joan nahi dutenek joan-etorria autobusez egiteko aukera bat baino gehiago izango dute. Horrela, Azpeitiko Ikastola Ikasberrik bezala, Orkatz Kultur Elkarteak ere autobusa jarriko du Kilometroetara joateko.
Orkatzekoen autobusa 09:30ean abiatuko da anbulatorio aurretik. Tolosan, berriz, 21:30ean izango da itzulerako ordua. Autobus horretan joan nahi dutenek Orkatzen eman behar dute izena, 10 euroren truke.