Abenduko zubia baliatuko du aurten ere Burdinbidearen Euskal Museoak tren historikoen zerbitzuen denboraldia ixteko. Hain zuzen ere, abenduaren 6tik 8ra sei joan-etorri egingo ditu trenak Lasaora. Eta igandean, abenduak 8, denboraldia agurtzeko jardunaldi berezia ospatuko dute museoan.
Hiru egunotako zerbitzu berezien programa honela osatuko dute:
- Ostirala, abenduak 6: 12:30ean lurrunezko trena aterako da museotik Lasaora.
- Zapatua, abenduak 7: 12:30ean eta 17:00etan lurrunezko trenen irteerak.
- Igandea, abenduak 8: irteerak 11:00etan (diesel-automotore batek bermatutako trena), 12:00etan (lurrunezko trena) eta 13:00etan (lurrunezko trena). Zirkulazio horiek ekitaldi honetan zehar tren historiko horien zerbitzuaz gozatzeko azken aukera izango dira. Horiez gain, 1920ko Grafton lurrunezko garabia eta 1932ko U-52 Bilboko tranbia elektrikoa martxan jarriko dituzte, museoan bertan.