Zortzigarren urtez jarraian, Udaleko Kirol sailak Zuk ere ahal duzu! Etorri lasterka egitera ekimena antolatu du. Udaleko Kirol sailak jakinarazi duenez, "adin guztietako emakumeei zuzendutako aktibitate fisikoa proposatu nahi dizuegu, sei astetan korrika egitearen onurak eta abantailak goza ditzazun".
Ekimena "osasun egoera egokian" dauden emakume guztiei dago zuzenduta, eta beste urteetan parte hartu dutenek ezingo dute aurten izena eman. Bi talde egingo dituzte, eta hilaren 23an hasiko dira martxan. Goizeko taldekoek astelehen eta ostegunetan egingo dituzte saioak, 10:00etatik 11:15era, eta kiroldegian elkartuko dira. Aldiz, arratsaldetakoak igerilekuan elkartuko dira, eta 18:15etik 19:30era egingo dute korrika, astelehen eta ostegunetan.
Izena igerilekuan bertan, Kirol sailera deituta (943 15 00 95) edo kirolak@azpeitia.net helbidean eman daiteke. Urtarrilaren 16an, ostegunean, egingo dute bilera informatiboa: goizeko taldea kiroldegian elkartuko da 10:00etan, eta arratsaldekoa 18:15ean, igerilekuan.