Ur Kontsortziotik hornitutako baserriei ur kontsumoari lotutako diru-laguntza eskaintzea onartu zuen Udalbatzak martxoaren 11ko ohiko udalbatzarrean. Lehen sektorea lagundu eta bultzatzeko hartu zuten erabakia. Laguntza jasotzeko ezinbestekoa izango da, ordea, honako baldintza hauek betetzea: ustiategia Azpeitian egotea, Nekazaritza Lan Unitatearen (NLU) koefizientea 0,5 baino handiagoa izatea eta dagokien jarduera betetzeko sektoreko araudiek eskatzen dituzten baimen guztiak edukitzea. Baldintza horiek betetzen dituzten baserrien jabeek %70eko laguntza jasoko dute 60 eurotik gorako kontsumoan (BEZ gabe).
Baserritarrek diru-laguntzak jasotzeko bi aukera izango dituzte. Laguntzak ordainketa bakar batean jaso nahi izanez gero, ur kontsumoaren faktura guztiak abenduaren 15erako aurkeztu beharko dituzte; eta bi zatitan jasotzea nahiago izanez gero, birritan aurkeztu beharko dituzte: ekainaren 15era bitartekoak lehenengo, eta abenduaren 15era bitartekoak, gero. Eskaerak nahiz fakturak Udaleko harreran aurkeztu behar dira epe tarte horietan.