Euskal Herriko Bigarren Mailako Aizkora Txapelketa irabazi du Mikel Larrañagak; eta, horrenbestez, Lehen Mailan lehiatuko da azpeitiarra 2015ean. Zapatuan, azaroaren 1ean, jokatu zuten txapelketako finala, Asteasun (Gipuzkoa), eta 19:59 minututan amaitu zituen lanak Larrañagak. Ugaitz Mugerza mutrikuarra izan zen bigarrena, 34 segundora, eta hori ere kategoriaz igoko da datorren urtean. Izan ere, lehen bi sailkatuentzat zegoen saria zapatuko proban: mailaz igotzea.
Lan hauek egin zituzten aizkolariek: 54 ontzako bina enbor, 60 ontzako bina enbor eta 72 ontzako beste bi ebaki zituzten. Lanak amaituta, honakoa da finaleko sailkapena:
- Mikel Larrañaga.
- Ugaitz Mugerza.
- Luis Mari Txapartegi.
- Eneko Otaño.
- Arkaitz Jauregi.
- Aratz Mugerza.
Lehen kana-erdikoa bateratsu amaitu zuten aizkolari guztiek. Ugaitz Mugerzak hartu zien aurre gainerakoei, eta segituan amaitu zuten Larrañagak eta Jauregik ere. Hurrengo bi enborrak mozten ere Mugerza izan zen lehena: 60 ontzakoa eta 72 ontzakoa lehen postuan ebaki zituen. Bigarren zatian, ordea, Larrañaga izan zen azkarrena, eta berak amaitu zituen arinen lan guztiak.
Saioa bukatu ostean, Uztarria.com-ekin hitz egin zuen Azpeitiko aizkolariak.