Aurtengo trinidadeen hirugarren eta azken eguna ospatuko dute gaur, astelehena, Nuarben. 17:30etik aurrera umeek jolasak, tailerrak eta txokolatada izango dituzte, eta iluntzean erromeria giroan agurtuko dituzte festak, Laja eta Narbaizarekin.
Asteburuan ederki gozatu dute nuarbetarrek eta bisitariek Trinidade festetan. Zapatuan sokamuturrarekin, afarian eta ordu txikiak arte luzatu zen gau-giroarekin eta igandean, besteak beste, Nuarberen eta Azpeitiaren arteko erronkarekin (argazkietan). Sokatiran, lokotx biltzen, korrika, zaku lasterketan edota asto karreran neurtu zituzten indarrak bi taldeek, eta nuarbetarrak nagusitu ziren azkenean.