Aitor Zubizarreta (Azpeitia 1995) saskibaloi jokalaria taldez aldatuko da hurrengo denboraldian, bi urtez Amerikako Estatu Batuetako Portanld Pilotsen ibili ostean. Idaho College izan da aukeratu duen taldea, "Ameriketan hasitako bideari jarraipena eman eta saskibaloian aukera gehiago bilatzeko asmoz", Iraurgi Saskibaloiko ordezkariek adierazi dutenez. Maiatzean hartu zuen Portland uzteko erabakia eta orduztik talde askok erakutsi dute azpeitiarrarenganako interesa, ISBko ordezkariek adierazi dutenez. "Unibertsitate ugarik erakutsi zuten interesa Aitorrengan eta honek bost bakarrik aztertu ditu", azaldu dute.
Aitor Zubizarretak Amerikako Estatu Batuetako NCAA-1 ligan jokatu du azken bi urteetan. Izan ere, Portland-eko Unibertsitateak beka bat eskaini zion lau urtez bertan ikasi eta Portland Pilots taldean jokatu ahal izateko. Orain, ordea, taldez aldatu eta Ameriketan ikasketekin jarraitzeko hautua hartu du. Hurrengo denboralditik aurrera Idaho College taldean jokatuko du, NAIA (National Association of Intercollegiate Athletics) mailan.
Azpeitiarrak Pilots taldean aurten izan duen papera "ez da erabakigarria izan" Iraurgi Saskibaloiko ordezkarien hitzetan. "25 partidatan jokatu du Zubizarretak eta partidako 5,9 minutu jokatu ditu bataz beste", Azpeitiko saskibaloi taldeak azaldu duenez. Horregatik, Amerikan hasitako bidean aldaketa egin eta Idaho Collagera aldatzea erabaki du azpeitiarrak. "Saskibaloian jokatzen jarraitzeko irrikitan eta baloratuta sentitzeko gogoz" dagoela azpimarratu du ISBk.