Landa garapena, ekonomia, kultura, berrikuntza, ingurumena... Aipatutako arloetan sailkatutakoak dira Gipuzkoako Foru Aldundiaren partaidetzazko aurrekontuen aurtengo prozesuaren buruan Urola Erdirako herritarrek lehenetsi dituzten proposamenak.
Aldundiak datorren urteko foru aurrekontuetako bi milioi euro jarri ditu, herritarrek eskualde mailan ikusten dituzten behar eta lehentasunen arabera aukeratutako proiektuak garatzeko. Eta hauek dira, bakoitzak jasotako babesaren hurrenkeran, aukeran zeuden 38 proposamenen artean herenegun Azkoitian egindako batzarrean lehenetsi ziren hamar egitasmoak:
- Eskualdeko baserri bideak konpontzea.
- Bailarako arte eszenikoen eskola.
- Eskualdeko ekonomia sustatuz, bertako produktuak eta bertako merkataritzaren aldeko proiektua.
- Landa eremuetako pertsona nagusientzako zerbitzuak.
- Energia subiranotasuna.
- Eskualde mailako sinismen zaharrak (mitologia) jaso, aztertu eta zabaltzera ematea.
- Udaleku parte-hartzaileak haur eta gazteentzat.
- Ekintzailetasun plana sustatzen jarraitu eskualdean: ekintzaile kultura herritarrengan, gazteengan ekintzaile baloreak ikastetxeen elkarlanaren bitartez, eta ekintzaileentzat zerbitzuak eta espazio fisikoak.
- Pasaiako Segadaren inguruko dokumentala egitea.
- Landa eremuetako baserrien ur gabezi arazoak konpontzea.