Kultur arloan partaidetzaren inguruko hainbat esperientzia jasotzeko asmotan, partaidetza kulturaren kudeaketaren parte egin dutenak gonbidatu dituzte bertara. Horien artean izan da Kepa Urbieta, Azpeitiko Kultur Mahaiko eta Sanagustin kulturguneko kidea, Gernikako Astra kulturarako fabrika sozialeko Joana Olabarriarekin batera. Elhuyar-eko Jon Abrilek gidatu du saioa. Hemen duzue entzungai, Casares irratiaren grabazioa.
Uhinetan, kulturari buruzko eztabaida herritarrak, uhinetan
Formatu berritzaile baten bidez, partaidetzan oinarritutako eztabaida eta irrati-programa bat uztartu dituzte Donostia 2016k eta Elhuyarrek. Gaian adituak diren hainbat lagunekin, publikoari zabalik egongo den irratsaioa egiten dute, 2016 Gunetik zuzenean, Casares irratiaren sintonian.
Hurrengo saioak uztailaren 1ean, 14an eta 21ean, izango dira, eta honako gaiak landuko dira: "Nola eman ahotsa normalean aukerarik ez dutenei"; "Tradizioa vs eraldaketa plaza publikoan, genero ikuspegitik" eta "Ahalduntze digitala eta teknologikoa". Hauetan parte hartzeko aukera ere luzatu dute, horretarako interesa duenak uhinetan@dss2016.eu helbidean eman ahal izango du izena.