Heldu da iraila eta, urtero bezala, Erniarraitz Bertsozale Elkartea hasi da 2015-2016 ikasturteko plangintza osatzen. Dagoeneko martxan da matrikulazio epea eta, orain arte bezala, Azkoitian eta Azpeitian bertso eskolak antolatuko dituzte ikasturte berriari begira.
Batetik, umeen taldeak egongo dira, horien berri ikastetxeetan bertan emango zaie ikasleei. Edonork eman dezake izena bertso eskolan eta, ondoren, guztien artean adotuko dituzte taldeak, eskola egunak eta ordutegia.
Bestetik, azken urteetan bezala, helduen taldea egongo da herriko bertsozale guztientzat. Beraz, goizeko ordu txikietan bertsotan ibiltzen diren herritar horiek guztiak gonbidatu dituzte taldera batzera. Era berean, sekula bertso bat abestu ez dutenak ere gonbidatu nahi ditu Erniarraitz Bertsozale Elkarteak.
Azpeitian bi talde osatu ohi dira. Astelehen eta astearteetan, 21:00etan, Erniarraitze elkartearen lokalean elkartzen dira. Ikastaroak Haritz Etxeberria Ministrok eta Jokin Uranga bertsolariek zuzenduko dituzte.
Ikastaroez gain, ikasturte honetan bi urtez behin ospatzen den Erniarraitz Sariketa izango da eta bertso eskolako ikasleekin Lasturren egonaldia ere egingo dute, urte osoan antolatzen dituzten hamaika bertso saioez gain.
Harremanetarako erniarraitz@gmail.com helbidera idatzi edo 635 00 73 37 zenbakira deitu behar da.