2014. urteko martxoaren 19an sei ikasle, tartean azpeitiar bat, atxilotu zituzten Gasteizko EHUko campusean egin zen elkarretaratze batean. Orain, atxilotu zituzten sei gazteentzat espetxe zigorra eskatzen du epaileak. Epaituei elkartasuna adieraziteko, muntaia poliziala salatzeko eta euskal presoen eskubideen aldeko ekimenek duten zilegitasuna azpimarratzeko, agerraldia egin zuten hainbat herritarrek atzo, irailak 8.
Euskal preso politikoek unibertsitatean ikasteko duten eskubidea aldarrikatzeko antolatu zen 2014ko martxoaren 19ko elkarretaratzea. Ondoren atxilotuko zituzten sei gazteak kontzentrazioan parte hartzen ari ziren beste ikasle askorekin batera. Ikasle batzuk mural bat margotzen hasi zirela-eta, campuseko segurtasun indarrek, kalez jantzitako ertzainek lagunduta, gazteetako bat bortxaz atxilotu zuten. Hori ikusita, ikasleek errepidean eserialdia egitea erabaki zuten. Ertzainak atxilotua kotxera eramaten hasi ziren, eta gainerako ikasleak atxilotuari babesa adierazten hasi ziren. Ertzainen furgoneta bat eta beste zazpi auto agertu ziren orduan, eta ikasleen aurka gogor oldartu ziren.
Ertzainen karga polizialak dozenaka zauritu utzi zituen, eta karga hori aprobetxatuta beste bost ikasle atxilotu zituzten ertzainek; horietako bat mugikorrarekin karga poliziala grabatzen hasi zelako. Ertzainen irain sexistak ere entzun behar izan zituzten atxilotuak askatzeko eskatzen ari ziren ikasleek. Karga poliziala justifikaziorik gabea izan zen.
Orain, atxilotutako ikasleei zigor gogorrak eskatzen dizkie fiskalak. Guztiei zigor ekonomikoa eskatzeaz gain, gazte bati hiru urte eta sei hilabeteko espetxe zigorra eskatzen diote. Gainerakoei, tartean Onintza Valverde azpeitiarrari, bina urteko espetxe zigorrak eskatzen diote. Irailaren 14an, datorren asteazkenean, 9:30ean izango da epaiketa Arabako Lurralde Epaitegian.
Kontzentrazioa asteazkenean
Euskal herritarren eskubide zibil eta politikoak bermatzeko, ikasleei babesa emateko, elkartasunetik konpromisora igaro eta herritar guztiok gure hondar aletxoa jarri behar dugula uste dugulako, azpeitiar guztiak irailaren 14an, 19:00etan plazan egingo den elkarretaratzean parte hartzera deitu nahi ditugu.