Azken zazpi urteetan egin bezala, Espabilau Eguna ospatuko dute lasaotarrek datorren zapatuan, ekainaren 10ean. Goizean hasi eta gauera arte egongo da zer egin eta zertaz gozatu Lasaon.
11:00etan hasiko da festa, herri-kirolekin. Lasaotarrek osatutako bi talde ariko dira elkarren artean lehian, eta honako lanak egiten arituko dira, besteak beste: trontzan, sokatiran, txinga jasotzen eta pilotan. Parte hartuko duten bi taldeak adin guztietako lasaotarrek osatuko dituzte.
Behin kirola eginda, paella txapelketaren tartea izango da, 13:00etan. Ondoren, 14:30ean, sabelak betetzeko unea izango da, eta aurrez prestatutako paellak jateko bazkaria egingo dute frontoian. Arratsaldean, 16:00ak aldera, musean eta mahai jokoetan aritzeko aukera izango da. Beranduxeago, 17:00etan, buruhandi tailerra eskainiko dute gaztetxoentzat. Egunari amaiera emateko, afaria egingo dute Lasaoko Herri Etxean, 21:00etan hasita.