Urola Garaiko Lehen Mailako Arreta Unitateetan, hots, anbulatorioetan, "arreta azkarragoa eta egokiagoa" emateko antolakuntza zerbitzu berria ezarriko du Osakidetzak. Eredu berriarekin medikuek, erizainek eta administrariek koordinatuta egingo dute lan. Horren helburua da pazienteen beharrak konpontzeko, gaixorik dauden pertsonak edo arreta behar dutenak profesional egokienera bideratzea. Asistentzia zerbitzua hobetzeko, anbulatoriora deitzen duten pazienteei zenbait galdera egingo dizkiete osasun zentroko administrariek. Modu horretan, zein behar dituzten identifikatuko dute, eta orduan jarriko dute pazientea erizainekin edo mediku espezialistekin harremanetan.
Azpeitiko anbulatorioan astelehenean, martxoak 11, ezarriko dute antolakuntza sistema berria, eta egun horretatik aurrera egongo da martxan.