Itsasi Euskal Kultur Taldeak zapatu honetan, azaroaren 30ean, ospatuko du aurten bere eguna. Ohi bezala, goiz eta eguerdi partean izango dituzte ekitaldiak, eta egungo taldekideak zein kide ohiak elkartuko dituen bazkariarekin borobilduko dute festa eguna.
11:30ean parrokian egingo duten elizkizunarekin hasiko dute Itsasi Eguna. Handik irtendakoan, Itsasiko dantzari txikiek ikuskizuna eskainiko dute Frontoi Txikian, eta bazkaria izango dute ondorengo hitzordua. Itsasiko kideek "taldekide ohi guztiak gonbidatu eta animatu nahi" dituzte bazkari horretan parte hartzera. Joan nahi dutenek, Itsasiko kideren bati esanda edo itsasieuskalkulturtaldea@gmail.com e-posta helbidera idatzita eman dezakete izena.