Asteburuan hasiko da xakeko taldekako Gipuzkoako liga eta azpeitiarrek etxean ekingo diote lehiari. Bi talderekin parte hartuko du ligan Xaputarrak taldeak: Domusa-Azpeitia A taldea ligako bigarren mailan lehiatuko da, eta Domusa-Azpeitia B taldea, berriz, hirugarren mailan.
Bihar arratsaldean izango dituzte lehen jardunaldiko norgehiagokak Azpeitiko bi taldeek, Baigera Ieko laugarren solairuan, 16:00etan hasita. Bigarren mailako taldekideek Olan Arkitektura taldekoen kontra jokatuko dituzte partidak, eta Urretxuko Goierri taldekoak izango dira hirugarren mailako Azpeitiko taldearen aurkariak.