Bihar, asteazkena, hiru hilabete beteko dira Zaldibarko zabortegian luizia izan zela eta bi behargin desagertu zirela, eta horien familietako kideek oroimen eta elkartasun ekitaldia deitu dute. Hain zuzen ere, herritarrei balkoietan eta leihoetan txaloak jotzeko deia egin diete, Alberto Sololuzeren eta Joaquin Beltranen oroimenez. Biharko 17:00etarako egin dute deialdia bi langileen gertukoek.
Otsailaren 6an jazo zen lur-jausia Zaldibarko Verter Recycling enpresan, baina oraindik ez dituzte aurkitu bi langileen hilotzak. Duela hilabete argitaratu zuen Uztarriak Nahia Sololuzeri, Alberto Sololuzeren alabari, egindako elkarrizketa. Honako lotura honetan irakur daiteke elkarrizketa osoa.