Igandean Eusko Legebiltzarrerako ordezkariak aukeratzeko hitzordua izango dute Arabako, Bizkaiko eta Gipuzkoako bizilagunek. Hautesle-erroldaren arabera, 11.321 azpeitiarrek izango dute botoa emateko eskubidea Azpeitian.
Gipuzkoan hamalau hautagai zerrenda aurkeztu dituzte igandeko bozetarako: EAJ, EH Bildu, PP-Ciudadanos, PSE-EE, Elkarrekin Podemos-IU, Pacma, Recortes Cero-Grupo Verde, Bidezko Mundurantz, Euskadiren Aldeko Libreak, Equo Berdeak, Aulki Zuriak, Vox, UCDE eta Alderdi Libertarioa.
2016ko irailaren 25ean egin ziren Eusko Legebiltzarrerako azken hauteskundeak, eta EH Bilduk eskuratu zituen boz gehien Azpeitian. Hain zuzen ere, 3.192 boto jaso ditu koalizioak. 117 botoren aldearekin, 3.075 boto lortuta, EAJ izan zen bigarren indarra. Boza ematera deituta zeuden herritarren %64,93k eman zuen botoa orduko hartan.
Posta bidezko botoa
Herritar batzuk igandean ez dira bozkalekuetara joango. Izan ere, bat baino gehiago dira posta bidezko botoa ematea erabaki dutenak. Hain zuzen ere, Araban, Bizkaian eta Gipuzkoan 125.255 hauteslek —erroldatuen %7,3k— eskatu du botoa posta bidez ematea. Gipuzkoan 32.074 herritar izan dira boza gisa horretan ematea eskatu dutenak. Gaur, ostirala, izango da posta bidezko botoa eskatzeko azken eguna; 14:00etan bukatuko da horretarako epea.
Hainbat neurri
Koronabirusak eragindako egoera tarteko, ezohiko babes eta segurtasun neurriak hartuko dituzte igandeko Eusko Legebiltzarreko hauteskundeetan. Botoa ematerakoan maskara erabiltzea, tartea zaintzea eta eskuak garbitzea izango dira betebeharreko neurri nagusiak. Hauteslekuetako sarreran eta irteeran gel hidroalkoholikoa jarriko dute, eta maskarak ere bai, botoa ematera maskara ahaztuta joaten diren herritarrentzat.
Aldaketa horiez gain, beste batzuk ere izango dira. Botoa ematerakoan, adibidez, norberak bere izen-abizenak esan beharko ditu hautes mahaian identifikatzeko, eta mahaiko kideek ezingo dute eskuetan hartu boto emailearen nortasun agiria. Gainera, Estefania Beltran de Heredia Eusko Jaurlaritzako Segurtasun sailburuak botoa etxetik prestatuta eramatea gomendatu du.
Hainbat herritan hauteslekuak ere aldatu dituzte; Azpeitian, baina, ez da horretarako beharrik izan, segurtasun neurriak bete daitezkeelako ohiko tokietan.
Emaitzak zuzenean, Uztarria.eus-en
Igandean Eusko Legebiltzarrerako bozen berri emango du Uztarriak webgunean. Goizean hasita, argazki bildumak, parte-hartze datuak eta abar ikusi ahal izango dira webgune honetan. Gainera, 20:00etatik aurrera, bozen emaitzen berri emango du Uztarriak.
Azpeitiko kontaketaren berri emateaz gain, emaitzak ere landuko ditu Uztarria.eus-ek, webgune berrituak eskaintzen dituen grafikoen eta tresnen bidez.