Hautsak harrotu ditu Antiguokok eta Athleticek hitzartu berri duten akordioak. Izan ere, Donostiako taldeak Realarekin zuen lotura hautsi eta Bilboko taldearekin lortu du kirol akordioa –1995 eta 2001 artean ere izan zuten hitzarmena bi taldeek–. Hain zuzen ere, duela hiru aste iraungi zen Realaren eta Antiguokoren arteko hitzarmena, eta aurrerantzean, 2030era arte, Athleticekin ariko da lankidetzan Donostiako kluba.
Gipuzkoako futbol taldeek ez dute begi onez ikusi akordioa, eta sare sozialetan Realarekin eta Gipuzkoako Futbol Federazioarekin daudela agertzeko hainbat argitalpen egin dituzte. Akordioarekiko desadostasuna agertu duen kluben artean da Azpeitiko Lagun Onak futbol taldea ere. Gipuzkoako taldeen arteko elkarlanean jarri dute arreta futbol klubek, eta Realarekin eta Gipuzkoako Federazioarekin duten lankidetzan jarri dute arreta, "gurea zaindu dezagun" gisako esaldiak erabilita.
Hona hemen, Lagun Onakek Twitterren jarritako txioa:
Gure baloreak eta printzipioak ez daude salgai. Gainontzeko gipuzkoako taldeekin elkarlanean jarraituko dugu. Gipuzkoako futbolaren alde lan eginez eta @RealSociedadEUS eta @gipuzkoafutbol -ekin ditugun lankidetzarekin jarraituz .Gurea zaindu dezagun. pic.twitter.com/3Ti3AwFmmW
— Lagun Onak FT (@lagunonak_FT) July 21, 2020