Gazte Koordinadora Sozialistak (GKS) deituta, eta Burgesiaren zuzeneko diktadura salatu lelopean, elkarretaratze jendetsua egin zuten atzo arratsaldean Azpeitian. Plaza bete egin zuten maskarak soinean eta metro eta erdiko tarteak zainduz osatutako ilaretan zeuden 160 bat herritarrek.
Gogor egin zuten azken egunetan indarrean jarri dituzten neurri murriztaileen kontra, neurri horiek, "osasuna babesteko aitzakipean", herritarren oinarrizko eskubideak urratzen dituztela iritzita; besteren artean, mugitzeko eskubidea, biltzeko eskubidea eta adierazpen askatasuna. Horrez gain, gazteriaren kriminalizazioa ere salatu zuten plazan bildutakoek.
Adierazi zuten "neurri totalitario" horien aurrean eta "eskubide zibil eta politikoen defentsan", eurek hautu garbia egin dutela: "Antolakuntza komunista". Aurreratu zuten datozen asteetan mobilizazio gehiago egingo dituztela, eta horietan parte hartzeko deia egin zieten herritar guztiei.