Azpeitiko Alde Zaharreko Tabernarien Elkarteak protesta deitu du biharko, Eusko Jaurlaritzak atzo iragarritako neurriek ostalaritzan eragingo dituzten kalteak salatzeko. S.O.S ostalaritza lelopean egingo du kontzentrazioa AZTEk, 17:30ean hasita, Azpeitiko plazan. Elkarteko kideek Azpeitiko ostalari guztiei dei egin diete bihar mobiliza daitezen.
Atzo iragarri zituen Iñigo Urkullu Eusko Jaurlaritzako lehendakariak "COVID-19aren transmisio kateak mozteko" bihartik aurrera –azaroa bukatu arte behintzat– indarrean izango diren neurri murriztaileak; besteak beste, etxeratze agindua ordubete aurreratzea eta ostalaritza guneak ixtea. Azken erabaki horrek "kezka" sortu die herriko ostalariei, eta neurrien aurrean desadostasuna agertzeaz gain, agindua "azken momentuan, asteburuaren atarian" iragarri izana salatu dute.