Durangoko Azoka ezohikoa izango da aurtengoan, eta Durangora ez ezik, Euskal Herriko hainbat txokotara ere iritsiko dira egitasmoaren barruko ekitaldiak; tartean, Azpeitira. Zu non, han DA! izenburupean, hainbat kontzertu izango dira han eta hemen: Azpeitian, esaterako, Gatibu eta Sua taldeek eskainiko dituzte kontzertuak.
Azokaren antolatzaileek bi kontzertu horietarako sarrerak eman dizkio Uztarriari, bazkideen artean zozkatzeko. Hain zuzen ere, Gatibuk abenduaren 5ean (19:00) Soreasu antzokian eskainiko duen emanaldirako bi sarrera zozkatuko ditu Uztarriak bazkideen artean, eta abenduaren 8an Suak (19:00) Sanagustin kulturgunean eskainiko duen kontzerturako, lau sarrera.
Uztarriako bazkideek ohiko bidea erabili beharko dute sarreren zozketan parte hartzeko: lehiaketakuztarria@gmail.com helbidera mezua idatzi beharko dute, izenburuan Sua edo Gatibu idatzita. Mezu horretan bazkidearen izen-abizenak, NA zenbakia, helbidea eta telefono zenbakia zehaztu beharko dira. Uztarriak datorren astelehenean, azaroak 30, egingo du sei sarreren zozketa parte hartzaile guztien artean.