Joan den ostiralean Nuarbeko Errastiola zerrategian gertatutako lan istripua salatu du gaur, asteartea, gehiengo sindikalak. ELA, LAB, ESK, STEILAS, EHNE eta HIRU sindikatuetako kideek eta beste hainbat herritarrek elkarretaratzea egin dute plazan, lan istripu gehiagorik ez! lelopean. CCOO sindikatuak atzo, astelehena, egin zuen elkarretaratzea.
Izaro Mujika ELAko ordezkariak adierazi duenez, beste bi lan istripuren berri ere izan dute gaur, eta gutxienez 60 dira aurten Euskal Herrian beren lanpostuetan hildako langileak. Mujikak nabarmendu du ezbehar horiek ez direla kasualitatearen ondorio: "Lan istripuak guztiz errotuta daude lan merkatuan dagoen prekarietate gordinarekin". Bestalde, LABeko Aihotz Aiestaranek azaldu du gaur egungo "lan estiloak eta presioak" eragiten dituztela halako istripuak, eta nabarmendu du "patronalaren aurrean" egongo direla. Era berean, insituzioei patronalarekin "ez lerrokatzeko" eskatu die.