Azpeitiko Udalak eta Baigera jubilatuen elkarteak urtero ekitaldia antolatzen dute 90 urte bete dituzten herritarrei aitortza egiteko. Aurten, pandemia dela eta, ez dute ohiko ekitaldia egin, baina beste modu batera bada ere aitortza egitea erabaki du udalak.
Aurten 40 lagunek bete dituzte 90 urte, eta horiei guztiei oroigarriak eman dizkie udalak. Hain zuzen, pergaminoa eta makila bana jaso dute 90 urte bete dituzten herritarrek. Udala arduratu da hori egiteaz. "Guztiei deitu diegu beren oroigarria jasotzeko eta esker ona adierazteko. Batzuk Basazabalen jaso dute oroigarria, eta etxean jaso nahi izan dutenei etxeraino eraman zaie oroigarria", azaldu du udalak.
Erakundeak aurreratu duenez, datorren urtean, "egoerak uzten badu", 2020an eta 2021ean 90 urte bete dituzten herritarrekin egingo dute ospakizun ekitaldia.
(Argazkiak: Azpeitiko Udala)