Salto! gazteentzako topaketa berriro egingo da uda honetan, Uemak antolatuta. Iaz, bertan behera geratu zen izurriteagatik, eta aurten "gogo biziz" bultzatu nahi dute antolatzaileek, beti ere "beharrezko osasun neurri guztiak jasota".
Ibilaldian parte hartu nahi duten gaztetxoek izena emateko aukera dute dagoeneko, eta inskripzioa zabalik izango da martxoaren 31 bitartean. Online egin daiteke, hemen klik eginez, telefonoz ere bai 943-81 66 99 telefonora deituta edo posta elektronikoz hezkuntza@uema.eus helbidera datuak bidalita. Matrikulak 89 euroko prezioa izango du.
Herri euskaldunetako gazteen topaketa
Uemak adierazi duenez, "herri euskaldunetako gazteak euskararen inguruan sentsibilizatzea, kontzientziatzea eta eragile aktibo bihurtzea" da topaketen helburua: Euskaraz bizi diren gazteek "inertziatik kontzientziarako saltoa ematea eta horrekin efektu biderkatzailea sortzea".
Antolatzaileen arabera, aisialdiarekin eta euskal kulturarekin lotutako programa erakargarria gozatu ahal izango dute parte hartzaileek. Hemen klik eginda informazio gehiago eskuratu daiteke topaketari buruz.
Begiraleak eta sukaldariak hartzeko deialdia
Topaketarako begiraleak eta sukaldariak behar ditu Uemak, eta horiek hautatzeko prozedura abiatu du. Hautaketa prozesuan parte hartu nahi dutenek martxoaren 31 baino lehen bidali beharko dute curriculuma, hemen klik eginda zehazten den prozeduraren eta baldintzen arabera.