Datorren asteburuan ez dute zine emanaldirik programatu Soreasu antzokian. Zapatuan, 16:00etan eta 19:00etan, aurten bi saiotan egingo duten San Jose trikiti jaialdiak hartuko du antzokiko oholtza. Igandean, berriz, beste saio bikoitz bat izango da Soreasun, En Tol Sarmiento (ETS) musika taldearena; bi kontzertu emango dituzte arabarrek igande arratsaldean, 16:30ean eta 19:00etan hasita. Musika emanaldi horiek direla eta, zineak atseden hartuko du asteburu honetan.
Martxoaren 28an (igandea) eta 29an (astelehena) piztuko dute berriro Soreasuko pantaila handia. Egun horietan, 19:00etan hasita, Dardara emango dute Soreasun, Marina Lameirok Berri Txarrak taldearen agurreko biran oinarrituta egin duen dokumentala.