Bihar jokatuko dira emakumeen Master Laboral Kutxa txapelketaren finalaurrekoak Irungo Uranzu pilotalekuan, 15:30ean hasita, eta bertan izango da Oihana Orbegozo pilotari azpeitiarra. Hain zuzen, bi partida izango dira biharkoan, eta horietan nagusitzen direnek jokatuko dute txapelketaren finala.
Azken orduko kontuak tarteko, aldaketak izango dira lehen finalerdian. Irantzu Etxebesteren lekua Naroa Elizaldek hartuko du, Etxebesteren osasun kontuen ondorioz. Horrenbestez, Naroa Elizalde Olatz Ruiz de Larramendirekin arituko da biharkoan, eta parez pare izango dituzte Iera Agirre eta Maite Ruiz de Larramendi.
Bigarren finalerdia Olatz Arriabalaga-Naroa Agirre eta Leire Garai-Oihana Orbegozok jokatuko dute. Master Laboral Kutxako antolatzaileen hitzetan, "bi bikoteek oso erraz atera zituzten aurrera final laurdenetako euren kanporaketak eta laurak ere sasoi bikainean daude".
15:30ean hasiko da pilota jaialdia, eta zuzenean ikusteko aukera izango da ETB1en.