Azpeitian ez da arraunean aritzeko aukerarik, baina asko dira Azpeititik kostaldeko herrietara kirol hori egitera joaten diren herritarrak, baita balentriak lortzen dituztenak ere. Enetz Goenagak, esaterako, Gipuzkoako Trainerilla Txapelketa irabazi berri du asteburuan, Zumaiako Telmo Deun elkartearekin.
Getarian jokatu zituzten finalak igandean, eta jubenil mailako gizonen Zumaiako ontziak irabazi zuen lehia, nagusitasunez. Izan ere, bigarren sailkatu zen San Juani hogei segundoko aldea atera zion Telmo Deunek. Zehazki, 16:21,92 denbora behar izan zuen estropada gauzatzeko Zumaiako trainerillak, eta 16:42,10 San Juanekoak. Hibaika izan zen hirugarren, 19:16,62 denborarekin.
Asteburuan Euskadiko Txapelketa jokatuko dute Zumaiako jubenil taldeko arraunlariek, Legution (Araba).