Reala B taldeak Espainiako Bigarren Mailara igotzea lortu zuen atzo, eta talde horretan bada azpeitiar bat: Oier Agirrezabala prestatzaile fisikoa. Urteak daramatza azpeitiarrak Zubietan zeregin horretan, eta azken urteetan Realeko gizonen bigarren taldeko kidea da.
Atzo Meridan (Badajoz, Espainia) izan zen taldearekin; izan ere, Reala Bk han jokatu zuen igoera faseko azken neurketa, Algecirasen aurka, eta luzapenean 2 eta 1 nagusituta, mailaz igotzea lortu du taldeak. Horrenbestez, datorren denboraldian Espainiako Bigarren Mailan ariko da Zubietako taldea.
Ospakizunetarako tartea ere izan zuten atzokoan, eta Agirrezabalak ere bat egin zuen taldearekin. Gainera, keinu berezia egin zion azpeitiarrak iazko udan moto istripuz hil zen beste azpeitiar bati, Lagun Onakeko jokalaria zen Ugaitz Kerejetari. Agirrezabalak haren kamiseta soinean zuela atera zuen argazkia.