Jexux Zelaia azpeitiarra hirugarren postuan bukatu du Igoera Bertikalen Espainiako Kopa, 50 urtetik gorako kirolarien mailan. Horrenbestez, bere buruari aurten ezarritako "helburu nagusia lortu" du Zelaiak.
Canfranc-en (Huesca, Aragoi, Espainia) bukatu zen igandean aurtengo Kopa, El Porte tontorrerako (2.440 metro) igoerarekin. Azpeitiarrak 55 minutu eta 24 segundo behar izan zituen Ibilbideko 3,8 kilometroak eta 1.110 metroko igoera metatua osatzeko, eta bigarren tokian sailkatu zen bere adin tartekoen artean, Angel Gonzalezen atzetik. Azken proban batutako puntuei esker, koparen behin betiko sailkapen nagusiaren podiumean sartzea lortu zuen Zelaiak. Gainera, duela bi urte lasterketa berean egin zuen marka zazpi segundotan ondu zuen herenegun. "Gustura egoteko moduko denbora, dauzkadan urteak kontuan hartuta", dio azpeitiarrak.
Zelaia El Porte igotzen, igandeko lasterketan. (Utzitakoa)