Osasun larrialdia tarteko, eskualdeko trikitilariak urteroko hitzordurik gabe gelditu ziren iaz. Dena den, ohiko ekitaldiak berreskuratzen ari diren honetan, bueltan izan zen atzo Trikigiro jaialdia ere, ez edonolako moduan, gainera. Izan ere, dozenaka trikitilarik eta pandero-jotzailek parte hartu zuten atzoko jaialdian. Hasteko, Sanagustin kulturgunean eskualdeko musikari gaztetxoen txanda izan zen. Aizarnazabaldarrekin hasi zen saioa, eta ondoren, herriko nahiz inguruetako beste hainbat trikitilari eta pandero-jotzaile igo ziren agertokira. Horren ostean, berriz, kalejira egin zuten herriko kaleetan zehar, eta egunari amaiera ederra emateko, 180 pertsona inguruk Sanagustinen afaldu zuten.
Lurdes Alkorta da Trikigiro jaialdiaren antolatzaileetako bat, eta hark adierazi duenez, "oso gustura" daude antolatzaileak seigarren edizio honek izan duen harrerarekin. Datozen urteetan ere Trikigiro antolatzen jarraitzeko asmoa nabarmendu du azpeitiarrak.
