Azkoitia eta Urretxu artean aurreratzeko erreia eraikitzen ari da Gipuzkoako Foru Aldundia, eta lan horiek tarteko, zenbait leherketa ari dira egiten azken asteetan. Abendura bitartean, astean bi leherketa egitea aurreikusi du aldundiak, eta hori horrela, egun horietan errepidea itxi beharko dute tarte batez. Aurreikuspenen arabera, itxierek ordubete baino gutxiago iraungo dute. Errepidea itxiko duten tarte horietan, Zumaia-Zumarraga autobus zerbitzuak (UK06) Bergaratik zehar egingo du bidaia.
Bidaia Bergaratik egingo dutenez, Azkoititik Zumarragara bitartean dauden zenbait autobus geraleku bertan behera geratuko dira, hala nola Azkoitiko industrialdekoa, Olotzagakoa, Aizpurutxokoa, Aginaga auzorako bidegurutzekoa eta Etxeberrikoa. Errepidearen itxierak egunean bertan jakinaraziko ditu aldundiak.