Ez dira egun asko falta San Silbestre lasterketa jokatzeko, eta dagoeneko hainbat herritarrek eman dute lasterketa herrikoirako izena. Xeye atletismo taldeak jakinarazi duenez, oraingoz 370 lagunek eman dute izena, eta "gustura" daude lasterketa izaten ari den erantzunarekin. Dena den, oraindik izen ematea zabalik dagoela gogorarazi dute, eta korrikalariak proban parte hartzera animatu dituzte; kirolprobak.com helbidean eman behar da izena.
Aurtengoa lasterketaren hogeigarren ekinaldia izango da, eta azken urteetan bezala, bi proba egingo dituzte: lasterketa irekia 11:30ean, eta lasterketa herrikoia 12:00etan. Azpeitiko plazan hasi eta amaituko dira bi probak. Lasterketa irekiak ez du sailkapenik izango, eta parte hartzeko ez dago izena eman beharrik; nahikoa izango da egunean 11:30erako plazara agertzea. Inklusioaren aldeko korrika saioa izango da, 600 metroko distantzia duena.
Horren ostean hasiko da lasterketa herrikoia. Ohi bezala, 5,8 kilometroko distantzia izango du probak: ibilbide bati bi itzuli eman beharko dizkiote partaideek. Proba horretan parte hartzeko, ezinbestekoa da aurrez izena ematea. Internet bidez izena emateko epea abenduaren 28an, asteartea, amaituko da, 23:59an; bederatzi euro ordaindu beharko da izen ematea. Hortik aurrera, lasterketaren aurreko egunean –abenduak 30, osteguna– eta egunean bertan –abenduak 31, ostirala– eman ahal izango da izena, Azoka Plazan, hamabost euro ordainduta.
2007tik aurrera jaiotakoek ezingo dute lasterketa herrikoian parte hartu; bai, ordea, lasterketa irekian. 2007tik aurrera jaiotakoek, aldiz, lasterketa herrikoian parte hartzeko aukera izango dute.
Dortsalak eta txipa
Korrikalariek dortsalean izango dute txipa; beraz, ez da horretaz arduratu beharrik izango. Dortsalak lasterketaren aurreko egunean eta egunean bertan banatuko dituzte, Azoka Plazan. Abenduaren 31n 10:00tan hasiko dira dortsalak banatzen, eta proba hasi baino ordu erdi lehenagora arte ariko dira zeregin horretan. Aurten 700 dortsal izango dira; antolatzaileek jakinarazi dute behin baino gehiagotan agortu izan direla, eta beraz, aholkatu dute azken unera arte izena eman gabe ez egoteko.
Proba amaitu ostean dutxatu nahi dutenek Izarraitz pilotalekuan izango dute horretarako aukera. Irteera gunetik ehun metrora dago frontoia, eta bertan izango da arropak uzteko aukera ere. Urtero bezala, sariak izango dira aurreneko hiru gizonentzat eta emakumeentzat, baita lehen azpeitiarrentzat eta azkoitiarrentzat ere. Gainera, parte hartzaile denen artean zozketak egingo dituzte.