Azpeitiko Udalak zapatuan banatuko ditu urteko kirolari onenen sariak. 12:00etan hasita egingo dute sari banaketa ekitaldia Sanagustin kulturgunean. Kirol modalitate hainbatetan aritzen diren herritarrak dira aurtengo hautagaiak, eta horien artean, kirolari onenen sariak –gizon eta emakume– eta boluntario onenaren saria banatuko ditu erakundeak.
Iaz, COVID-19aren pandemia tarteko, ez zuten kirolari onenen sarien ediziorik egin. 2019an egin zituzten azken izendapenak, eta orduko hartan Vanesa Cerrajero eta Julen Lopetegi triatletek urtean zehar egindako lana nabarmendu zuen epaimahaiak. Boluntarioaren izendapena, berriz, Ilunpe pilota elkarteak jaso zuen.