Lagun Onak Mendi Bazkunak antolatzen duen Mendiko Ahotsak egitasmoaren beste saio bat egin zuten atzo, osteguna. Jose Luis Eizagirre mendizaleak 2007an Perura egindako espedizioa izan zuen hizketagai Soreasu antzokian elkartu ziren dozenaka lagunen aurrean, eta abentura haren nondik norakoak azaldu zituen azkoitiarrak. Eizagirrek ez ezik, beste zazpi lagunek egin zuten espedizio hura, tartean Benantxio Irureta eta Aritz Odriozola zirenek, eta hain zuzen, hizlariak bi mendizale azpeitiar horiei eskaini nahi izan zien atzoko solasaldia.
Andeetan dagoen Huascaran mendia (6.768 metro) igo zuten zortzi mendizaleek 2007an egin zuten espedizioan, hori baita Peruko mendirik altuena. Balentria hura gogoratu zuen atzo Eizagirrek, orduan ateratako argazkiekin lagunduta. Urola Kostako Hitza egunkariak, berriz, atzo argitaratu zuen hitzaldiaren harira Eizagirreri egindako elkarrizketa.
(Argazkiak: Lagun Onak MB)