Azpeitiko Sarek salatu duenez, pankartak jartzen ari ziren bi gazte identifikatu nahi izan zituen atzo –astelehena– Ertzaintzak. Zehazki, abenduaren 31rako antolatu duten manifestaziorako deia egiten zuten pankartak ari ziren jartzen. Sareren arabera, "ertzainen mehatxupean" lortu zuten gazteek pankartak jartzea, eta behin ekintza hori bukatzean, atzetik jarraitu eta gelditu egin zituzten.
Sareren arabera, "hasieratik oldarkor" agertu ziren bi ertzainak, eta "une oro gaztelaniaz mintzatuz" eskatu zieten identifikazioa bi gazteei. Sarek "gogor salatu" nahi du atzo arratsaldean gertatutakoa, "eskubideen urraketak behin betiko amaitzeko exijitzen ari garen garai hauetan".
"Horrelako ekintzek erakusten dute batzuek korrentearen aurka dihardutela oraindik. Jarrai dezagun bidea egiten. Orain da unea. Abenduaren 31n denok plazara. Pow eta Gotzon Etxera", erantsi du Sarek.