Aurrera doa Lagun Onak Mendi Bazkunak bere 75. urtemuga dela-eta martxan jarri zuen Mendiko Ahotsak solasaldi zikloa. Hain zuzen ere, beste zita bat iragarri du elkarteak: otsailaren 16an, asteazkena, Azpeitian izango dira Sean Villanueva eta Nico Favresse eskalatzaile belgikarrak.
Lagun Onakek azaldu duenez, "punta-puntako" eskalatzaileak ez ezik, folk musikariak eta komunikatzaile apartak ere badira bi gonbidatuak. "Noizbat ikusi dituztenek argi esaten digute: erotuta daude, bizitzaz maiteminduta. Eta emozio hori guztia transmititzen dakite, ez dute parekorik horretan".
Emanaldia Soreasu antzokian izango da, 20:00etan hasita, eta solasaldira joan nahi duten herritarrek dagoeneko eskura ditzakete sarrerak Kulturaz.eus webgunean, hamasei euroren trukean.