Asteburuan Andoaingo Piano Jaialdi entzutetsuaren 17. edizioa izango da, eta urtero bezala, Juan Antxieta musika eskolako hainbat ikaslek parte hartuko dute bertan. Zapatuan eta igandean izango da jaialdia, Bastero kulturgunean, eta hitzordu horren aurretik ikasitakoak jendaurrean erakusteko aukera izango dute Azpeitiko piano ikasleek.
Hain zuzen ere, piano emanaldia eskainiko dute Andoaingo Jaialdian parte hartzekoak diren musika eskolako hamabost ikasleek. Ostegunean izango da saioa, Soreasu antzokian, 20:00etatik aurrera. Herritarrek musika eskolako ikasleek eskainitako piano doinuez gozatzeko parada izango dute.