Udal Liburutegiak irakurzaleentzako bi hitzordu berri jarri ditu. Hain zuzen ere, gaztetxoei zuzendutako Irakurleen Txokoko hurrengo saioa otsailaren 23an izango da, eta helduen Literatura Solasaldia, berriz, martxoaren 8an.
Irakurleen Txokoan Lehen Hezkuntzako bosgarren mailatik DBH 1. mailara arteko ikasleek parte har dezakete, eta otsaileko saioan Printze txikia liburua landuko dute. Otsailaren 23an, asteazkenez, 17:30ean hasita ariko dira liburu horri buruz solasean. Udal Liburutegiko arduradunek adierazi dutenez, hitzordura joan nahi duten gaztetxoek liburutegian eskura dezakete liburu hori dagoeneko.
Helduen Literatura Solasaldiaren hurrengo zita martxoaren 8an izango da, eta Idoia Garzesen Mendiko gaitza liburuari buruz ariko dira saio horretan. Hara joan nahi duten herritarrek ere liburutegian eskura dezakete Garzesek 2019an Zubikarai saria tarteko idatzi zuen liburua.