Baigera jubilatuen elkartea batzordekide berrien bila ari da. Izan ere, elkartearen estatutuek diote batzordekideek bi edo lau urteko jarduna izango dutela, baina COVID-19aren izurria tarteko, azken bi urteetan ezin izan dute batzar orokorra egin, eta batzordekide gehienak beren jardunaren epealdia betetzear daude. Horregatik, elkarteko kideek uste dute beharrezkoa dela erreleboa, "ideia eta proposamen berriekin batzordea aberasteko".
"Lanerako gogoa duen jendea" behar dutela nabarmendu dute Baigerako kideek: "Administrazioaz eta diru kontuez arduratuko den norbait komeni zaigu, teknologia berriak menperatzen dituena, euskaraz idazten dakiena, edo besterik gabe, talde lanean lagundu nahi duena. Denak izango dira ongi etorriak".
Datozen asteetan jendea Baigerara izena ematera joatea nahi dute elkarteko ordezkariek, ondoren, kide berri horiek batzar orokorrean aurkezteko.