Txukun enpresa egunotan ari da Urola ibaiaren Azpeitiko zatia garbitzen. Atzo hasi zuten garbiketa, eta hainbat eta hainbat hondakin atera zituzten atzo Loiola inguruko ibai zatitik. Datozen egunetan jarraituko dute lanekin, eta eguraldiak baldintzatzen ez badu, lanak datozen bizpahiru astetan bukatzea aurreikusten dute.
Azpeitiko Udalaren eskariz egingo du enpresak garbiketa, Azkoitiko San Juan futbol zelaiaren ingurutik Corrugados Lasaora arteko 9,8 kilometroko tartean. Azpeitiko Udalak nahiz Urola Bizirik natur taldeak "zerbait" egin beharra zegoelako erabaki zuen garbiketa gauzatzea, hainbat hondakin daudelako pilatuta Urola ibaian.
Garbiketan atzematen dituzten isurketa guneak desagerraraztea ere nahi dute bi erakundeek, eta horregatik, atzematen dituzten isurketa guneen kokapenen berri emateko eskatu diote garbiketa egingo duen enpresari. Bestalde, Urola ibaian biltzen duten zaborra Lapatxera eramango dute, hondakin horiek han sailka eta kudea ditzaten. Urola Bizirikek, gainera, hainbat argazki aterako ditu garbiketa prozesuan, eta horiek ikusgai jarriko dituzte gero.
Hona hemen, garbiketa hasi aurretik Urola ibaiak Loiola parean zuen itxura: