Iñurri elkarteak minbiziaren bueltako ekitaldi solidario bat antolatu du martxoaren 25erako. Elkarteak azaldu duenez, minbiziak "inposatzen duen isiltasuna" hausteko eta "tabuak azaleratzeko" antolatu dute ekitaldia. Tabuen kutxa solidarioa izenburupean, elkartearen aurkezpena, mahai ingurua, umorezko bakarrizketa saioa eta kontzertua izango dira egun horretan, 19:00etatik aurrera, Sanagustin kulturgunean.
Hain zuzen ere, Iñurri elkartearen nondik norakoak aurkeztuko dituzte aurrena, eta ondoren, Minbizia biluzten mahai ingurua eskainiko dute Saioa –@elcasorosa Intagram sare sozialean– eta Olatz Mercaderrek, Maider Galardik gidatuta. Segidan, umorezko bakarrizketa saioa eskainiko du Beatriz Egizabalek, eta gero, kontzertu akustikoa eskainiko du Idoia Asurmendik.
Dagoeneko salgai daude ekitaldi solidariorako sarrerak, hamabost eurotan. Horiek Kulturaz.eus webgunean eskura daitezke.