Pandemia dela-eta urtebetez geldirik egon ondoren, Gipuzkoako taldekako liga jokatzera itzuli dira aurten Azpeitiko xakelariak. Bestetan bi talderekin lehiatu izan dira, baina 2022an talde bakarra osatu dute, "jende faltarengatik".
Hala ere, emaitza oso onekin ekin dio itzulerako denboraldiari Domusa Azpeitia taldeak. Ligako Lehen Mailan ari da Azpeitiko taldea; zortzina taldeko bi multzotan jokatu dute lehen fasea, eta bere multzoko lehen postuan bukatu du fase hori Azpeitiko taldeak. Ondorioz, Gorengo mailara igotzeko fasea ari da jokatzen orain. Joan den asteburuan, lehen faseko beste multzoan bigarren sailkatu zen Elgoibar A taldearen kontra lehiatu ziren Azpeitiko xakelariak, eta 2,5 eta 1,5eko emaitzarekin nagusitu zen Domusa Azpeitia taldea. Aitor Priyak eta Miguel Gomezek irabazi, Andres Perezek berdindu eta Eneko Alberdik galdu egin zituzten beren neurketak.
Azpeitiko xakelariek gogorarazi dute xakean jokatu nahi duten herritarrek irekita dituztela taldearen ateak. Astelehenetan eta ostegunetan elkartzen dira, 18:00etatik aurrera, Baigera I-eko laugarren solairuan.