Loiolatarrak dira Iñigo eta Aitzol Arregi, eta ondo baino hobeto ezagutzen dituzte auzoko festen nondik norakoak. Iñigok urte mordoxka darama antolatzaile lanetan; Aitzol hurrengo belaunaldikoa da, baina hark ere gertutik ezagutu ditu festak betitik. Azken urteetan elkarrekin aritu dira antolakuntza lanetan, eta atzera begira jarri dira, oroitzapenak elkarbanatuz. Gainera, herritarrei dei egin diete igandean Loiolara joateko. "Eguraldi ona eman dute iganderako, eta giro polita egongo da", aurreratu dute.
San Jose egunaren biharamunean, martxoaren 20an, igandez, ospatuko dituzte aurtengo festak. 11:00etan hasiko dute egitaraua; zezen txikiak izango dira Loiolako basilikaren aurreko zabalgunean. Ondoren, 13:00etan, asto karrera izango da, Loiolako jaien berezigarri nagusia.
Arratsaldean, berriz, 17:30ean hasita, herri kirol saioa egingo eskainiko dute Eneko Otaño eta Ugaitz Mugertza aizkolariek eta Aimar Irigoien nahiz Goenatxo III.a harri-jasotzaileek. Gainera, goizean nahiz arratsaldean haurrentzako puzgarriak izango dira, eta trikitilariak arduratuko dira giroa alaitzeaz.