Hastear da Gipuzkoako Eskolarteko Txapelketaren XLII. edizioa. Guztira, 17 gaztek parte hartuko dute bat-bateko atalean, eta hiru kanporaketek eta finalak osatuko dute txapelketa. Hain zuzen, gaur jokatuko dute Eskolartekoaren lehen kanporaketa Oñatin. Bigarren kanporaketa Azpeitian jokatuko dute apirilaren 1ean, eta hirugarrena Lizartzan, apirilaren 8an. Finala apirilaren 29an izango da, Lasturren.
Gaur Oñatin jokatuko duten kanporaketan honako bertsolariak arituko dira kantuan: Jon Mendiluze, Aratz Arzelus, Lide Arregi, Jakes Etxeberria eta Uxue Ostolaza. Azpeitiko saioan Ane Zubia, Naia Arrizabalaga, Beñat Mateos, Xabier Albizu, Aratz Lasa eta Harri Agirresarobe bertsolariak entzuteko parada izango da. Hirugarren eta azken saioan finalera sailkatzeko lanean arituko dira Amets Aizpurua, June Aiestaran, Danel Etxeberria, Malen Gartzia, Izar Zelarain eta Sustrai Goenaga.
Kanporaketa bakoitzeko irabazleek eta puntuaziorik onena duten beste hiru bertsolari sailkatuko dira apirilaren 29an jokatuko den finalera.
Sarrerak, salgai
Azken urtetan bezala, aurtengoan ere Gipuzkoako Eskolarteko Txapelketaren kanporaketa guztiak bertso afari formatuan egingo dituzte, eta dagoeneko salgai daude saioetarako sarrerak. Hain zuzen, www.bertsosarrerak.eus atarian jarri dituzte txartelak salgai, hamabi euroan.