Juaristi ISBk ezin izan zuen atzo, asteazkena, Basquet Girona mendean hartu. Urtarril amaieran bertan behera utzi zuten 18. jardunaldiko partida jokatu zuten kataluniarrek eta Azkoiti-Azpeitiko taldeak. NBAn ibilbide luzea egin duen Marc Gasol jokalari ezagunaren taldearen aurka aritu zen ISB, baina ez zuten garaipena poltsikoratzeko modurik aurkitu. Atsedenaldira partida orekatuta iritsi bazen ere, hirugarren eta laugarren laurdenetan etxeko taldeak egin zuen lana ona izan zen.
Talde bakoitzak norbere kartak erakutsi zituen lehiaren hasieran, eta partidari txukun ekin zioten. Basquet Girona errenta txikiak lortzeko gai izan zen Iñaki Jimenezen taldearen aurrean. Hala eta guztiz ere, Juaristi ISBk nortasuna erakutsi zuen, eta aurkariaren oldarraldiei eutsi zien, baita Gasolen uztaipeko jokoari ere. Pibota, ordea, pisua irabazten joan zen bere taldearen mesedetan, eta aurkariak erakarrita min handia egin zuen.
Atsedenaldira 38 eta 36 iritsi zen neurketa, baina hortik aurrera etxeko taldeak beste bide batzuk aurkitu zituen erasoan, eta bereziki, min handia egin zuten kataluniarren joko antolatzaileek. Juaristi ISB azken laurdenean saiatu zen aurkariarengana markagailuan hurbiltzen, baina etxekoek partidaren erritmoa kontrolpean izan zuten une oro, eta garaipena etxean gelditu zen
Atzoko partidan Manex Ansorregi azkoitiarrak lortu zuen taldeko balorazio onena, 21 punturekin. Aldiz, Ondrej Hanzlik (20) eta Sidy Cissoko (16) izan ziren taldeko saskiratzaile nagusiak. Igandean, Juaristi ISBk Tau Castello taldearen aurka jokatuko du Azkoitiko Elkargunean, 17:00etatik aurrera.