Duela aste batzuk hasi ziren Vladys Kutxerenko eta Alex Sarasua Ukrainara bidaltzeko produktuen bilketa egiten Sanjuandegin, eta haien egitasmoarekin bat eginez, Iberotarren plazako bizilagun talde batek zeregin horri ekin dio. Plaza horretan bertan muntatu dute biltegia, 1. zenbakiaren beheko lokalean, eta gaur, ostegunarekin, hasi dira elikagaiak nahiz bestelako produktuak jasotzen.
Ostegunero egingo dute bilketa, goizez 10:00etatik 12:00etara bitartean, eta arratsaldez, 17:00etatik 19:00etara. Herritarrek askotariko elikagaiak eraman ahal izango dituzte hara, hala nola atun eta sardina latak, dilistak, babak, makarroiak, arroza, gailetak, txokolatea, olioa, ura, esnea nahiz umeentzako esne hautsa. Horrez gain, baina, bestelako produktuak ere bilduko dituzte: ur oxigenatua, bendak, hidro-alkohola, konpresak, fardelak, biberoiak zein muki zapiak, besteak beste. Bilketa gauzatzen ari diren herritarrek arroparik ez dutela jasoko adierazi dute.