Lagun Onak txirrindulari taldeak antolatuta, junior mailakoen San Jose Sariaren XXXIX. edizioa jokatu dute gaur, igandea, arratsaldean Azpeitian. Azpeitiko Ikastola Ikasberriren kanpoaldetik abiatuta, txirrindulariak 77 kilometroko ibilbidea osatu dute, eta Oscar Fuentes izan da txapelduna. Alimco-Campagnolo taldeko txirrindulariak 2:12:07 eginda osatu du lasterketa, eta denbora bera egin du Iker Zabaleta Atracciones Sanz taldeko azpeitiarrak ere. Izan ere, lehia bizia izan da helmugaratu diren aurreneko lau txirrindulariren artean, baina azkenean Fuentesentzat izan da garaipena. Hirugarren postuan, berriz, Ibai Aranza geratu da (2:12:08).
16:00etan hasi da lasterketa, eta Azpeititik Zestoara joan dira txirrindulariak; handik, Iraetara nahiz Arroagoira joan dira kirolariak, eta bi itzuli egin dizkiote ibilbide horri. Loiola hotelaren parean bukatu dute proba.