Sortzaile gazteei eta berriei zuzendutako sorkuntza beken 2022ko deialdia azken txanpan sartu da, eta larunbatean itxiko dute beketara proiektuak aurkezteko epea. Musika, pintura, eskultura, literatura, antzerkia, zinema, komikia, soinua, ikus-entzunezkoak, konposizio digitala, dantza... Askotariko kultur adierazpideei lotutako proiektuak aurkez daitezke sorkuntza beketara.Oinarriak, eskaera orria eta beken deialdiarekin lotutako gainerakoak azpeitia.eus webgunean daude eskuragarri.
Zazpigarren aldia beteko du aurten Azpeitiko Udalak eta Kulturaz kooperatibak antolatutako deialdiak, eta aurreko urtean bezala, aurten ere 20.000 euro banatuko dituzte guztira Azpeitiko sorkuntza bekek: 12.000 euro sorkuntza proiektuak bultzatzeko, eta 8.000 euro Dinamoan bi sormen egonaldi laguntzeko.