Promozio Mailako Buruz Buruko Pilota Txapelketaren aurkezpena egin dute gaur, asteartea, Portugaleteko Bizkaia zubian (Bizkaia). Bertan izan dira txapelketan parte hartuko duten zazpi pilotariak: Egiguren V.a eta Alberdi II.a azpeitiarrak, Larrazabal, Zabala, Elordi, Salaberria eta Zubizarreta III.a. Horiez gain, erabakitzeko dago zein izango den zortzigarren lehiakidea: Jon Alberdi azpeitiarraren eta Bakaikoaren arteko kanporaketa irabazten duenak egingo du aurrera.
Egiguren V.ak larunbatean, apirilaren 2an, jokatuko du neurketa, Larrazabalen aurka, Amurrion (Araba). Zabalak eta Alberdi II.ak ere egun berean neurtuko dituzte indarrak, Albeldan (Huesca, Espainia). Elordik eta Salaberriak, berriz, apirilaren 8an, ostiralez, jokatuko dute partida, Irurtzunen (Nafarroa), eta hurrengo egunean, Zubizarreta III.ak eta Alberdik edo Bakaikoak, Iruñean.
Final laurdenetako liga horretatik aurrera egiten dutenek maiatzaren 7an jokatuko dituzte finalaurrekoak, eta finala, berriz, maiatzaren 21ean izango da, Iruñeko Labrit pilotalekuan.