Golden Apple Quartetek, Xabier Zabala konposatzaileak eta Azpeitiko Udal Musika Bandak Golden Xey ikuskizuna eskainiko dute apirilaren 9an Azpeitiko Soreasu antzokian, eta bandako kideak emanaldiaren prestaketan dabiltza duela hilabete ingurutik. Atzo, asteartea, entsegu berezia egin zuten, ordea; izan ere, Zabala bera bertaratu zen musika bandak Soreasun duen lokalera, eta bandako zuzendari Unai Frantzesenarekin batera aritu zen entsegua gidatzen. Hain zuzen, apirilaren 9ako emanaldian herriko musika banda arduratuko da Zabalak moldatutako abestiak jotzeaz. Zabalak soinuarekin lagunduko die, eta Golden Apple Quarteteko laukoteak jarriko die ahotsa abestiei. Lau horiek datorren astean etorriko dira Azpeitia bandarekin entseatzeko, eta hitzordu hori aprobetxatuko dute emanaldiari azken zertzeladak emateko.
Emanaldirako sarrera doakoa izango da, baina gonbidapenak eskuratu behar dira, eta horiek Kulturaz.eus webgunean lortu daitezke.
Golden Apple Quartetek Los Xey musika talde zenari omenaldia egiteko sortutako Golden Xey ikuskizuna da Soreasun eskainiko dutena. 2019an estreinatu zuen emanaldia, Errenteriako Musika Bandarekin batera, eta orain Azpeitiko Musika Bandaren txanda izango da.
